Blerant Ramadani, sekretari i përgjithshëm i ASH-së së udhëhequr nga Arben Taravari ka ironizuar me përgjigjen ndaj pyetjeve të ASH-së Selës lidhur me praninë e Taravarit dhe zyrtarëve të tjerë shqiptarë në ceremoninë e betimit të presidentit Trump në Uashington.
“Për disa dera e Washingtonit është e hapur lehtësisht, ndërsa për disa të tjerë si çerdhe e non-gratave është një mur hermetik dhe një kujtesë ironike se nuk mjafton vetëm pasaporta për të kaluar kufijtë.
Liria e lëvizjes është pjesë e Demokracisë, por jo për të gjithë dhe jo me të njëjtin bagazh politik”, ka shkruar Ramadani në një postim në rrjetet sociale.
Aleanca për Shqiptarët me kryetar Ziadin Selën, pjesës e koalicionit opozitar Fronti Europian ka dalë me një thirrje publike deri te Komisioni për Parandalimin e Korrupsionit (Antikorrupsioni) që të hetojë procesin e marrjes pjesë të funksionarëve të Maqedonisë së Veriut në inaugurimin e presidentit të ShBA-ve, Donald Trump, transmeton TV21.
Nga krahu i ASH-së së Selës kërkuan që Antikorrupsioni të hetojë se kush i mbulon shpenzimet e blerjes së biletave, transportit dhe qëndrimit të funksionarëve të lartë qeveritarë në Uashington. (INA)