Sekretari i Përgjithshëm i Aleancës për Shqiptarët, Blerant Ramadani, ka përshëndetur legalizimin e objektit shkollor në fshatin Nerovë të Krushevës, duke e cilësuar këtë zhvillim si një fitore të madhe për komunitetin shqiptar dhe një hap konkret drejt garantimit të arsimit në gjuhën shqipe.
“Një ëndërr e gjatë, një betejë e drejtë dhe një fitore e merituar!” – shkruan Ramadani në një postim, duke theksuar se ky sukses është rezultat i vendosmërisë së prindërve, përkushtimit të komunitetit dhe përkrahjes së pakursyer të Ambasadorit të Shqipërisë në Maqedoninë e Veriut, z. Denion Meidani.
Sipas tij, ky angazhim i përbashkët ka hapur rrugën për kushte më të mira mësimi për mbi 120 nxënës shqiptarë në këtë zonë.
“Faleminderit të gjithë atyre që nuk u dorëzuan dhe besuan se arsimi është e drejtë, jo luks. Kjo është një fitore e merituar për fëmijët tanë, për gjuhën tonë, për të ardhmen tonë!” – përfundon Ramadani.(INA)
