Në skenarin më të keq, bota do të zhytej në recesion dhe do të humbiste një trilion dollarë në GDP (Bruto Prodhimin e përgjithshëm).
Ka shumë debate rreth pasojave ekonomike të luftës në Izrael dhe asaj që pret përpara, veçanërisht duke pasur parasysh se sa e prekshme (mbetet) bota pas pandemisë dhe konfliktit në Ukrainë.
Bloomberg raportoi këtë javë se nëse Irani përfshihet në konfliktin izraelito-palestinez, ekonomia globale do të bjerë në recesion me një rritje të çmimeve të naftës.
Sipas Bloomberg Economics, analistët po shikojnë ndikimin në rritjen globale dhe inflacionin bazuar në tre skenarë të mundshëm:
“Ndërsa të tre skenarët ka të ngjarë të shkaktojnë çmime më të larta të naftës, inflacion më të lartë dhe rritje më të ngadaltë ekonomike globale, një luftë e gjithanshme midis Iranit dhe Izraelit do të bënte dëmin më të madh”, thonë analistët.
“Sa më shumë përhapet konflikti, aq më shumë ndikimi i tij bëhet global, jo rajonal… Një konflikt në Lindjen e Mesme mund të tronditë botën, sepse ai rajon është një furnizues kryesor i energjisë dhe një portë kryesore e transportit,” shkruajnë analistët.
Në këtë rast, çmimi i naftës mund të rritet në 150 dollarë për fuçi. Inflacioni global ka të ngjarë të rritet në 6.7%, krahasuar me parashikimin aktual të FMN-së për vitin 2024 prej 5.8%.
Rritja globale gjithashtu ka të ngjarë të bjerë me 1% nga parashikimet aktuale për vitin e ardhshëm, në 1.7%, që do të ishte më e keqja që nga viti 1982.
Në terma monetarë, kjo do t’i kushtonte ekonomisë globale rreth 1 trilion dollarë.
Analistët argumentojnë se – me një kombinim të të gjithë këtyre faktorëve – efektet do të ndiheshin shpejt, pasi shumë vende janë ende duke luftuar me inflacionin e shkaktuar nga sanksionet perëndimore kundër Rusisë. Gjegjësisht, ato vende kanë riorientuar tregtinë globale, duke përfshirë rrjedhat e naftës dhe gazit.
“Një luftë tjetër në rajonin e prodhimit të energjisë mund ta shtyjë ekonominë globale në recesion,” vuri në dukje Bloomberg, megjithatë, duke vënë në dukje se një konflikt i drejtpërdrejtë midis Iranit dhe Izraelit mbetet një “skenar i pamundur”.
