Pala mbrojtëse e tre të akuzuarve në rastin “Lidhja Ndërkombëtare” mes të cilëve edhe Bojan Jovanovski, në seancën e sotme gjyqësore në Gjykatën themelore Shkup, theksoi se nuk do t’i marrë në pyetje dëshmitarët e propozuar, përkatësisht se nuk do të prezantojnë prova verbale, derisa nuk mundësohet prezantim i provave materiale që janë në telefonin e të akuzuarit të parë Jovanovski.
Avokati Sasho Dukovski thotë se derisa përmbajtja e komunikimit Wats App nga telefoni i konfiskuar i Bojan Jovanovskit nuk nxirret në mënyrë të paraparë me ligj, dhe të prezantohet si provë në këtë procedurë, si palë mbrojtëse nuk do të kërkojnë që të akuzuarit të dëshmojnë.
Ai kërkoi nga gjykata që kjo kërkesë të mos interpretohet si mbrojtje me heshtje. I akuzuari i parë Jovanovski nga gjykata kërkoi që t’i kthehet telefoni duke thënë se do t’i duhen nga 3 deri 7 ditë që të nxirren të dhënat. Dëshmitarët e propozuar dhe të pranuar nga ana e gjykatës, ai si i akuzuari i parë ka të drejtë t’i prezantojë para gjykatës.
