“Ohri është i shtrenjtë? Atëherë mos ejani!” – Ky është reagimi i drejtpërdrejtë i një punonjësi lokal në sektorin e gastronomisë në Ohër, ndaj ankesave të shumta të turistëve për çmimet gjithnjë e më të larta në këtë qytet turistik.
Në disa prej kafeneve dhe restoranteve në qytet, një kafe ekspres kushton 150 denarë, apo 2.50 euro, ndërsa një Americano arrin çmimin prej 170 denarësh apo gati 3 euro. Një sallatë e zakonshme mund të shkojë deri në 600 denarë apo 10 euro, ndërsa një racion patate të skuqura kap çmimin prej 350 denarësh apo gati 6 euro.
Një tjetër rast që ka ngjallur reagime është rizotoja, që arrin në 900 denarë (15 euro), ndërsa një mëngjes me vezë, proshutë dhe perime kushton 430 denarë (7.50 euro), raporton portali “Lokalno”.
Megjithëse qyteti është aktualisht i mbushur me vizitorë, shumë pronarë të kapaciteteve akomoduese raportojnë një rënie të dukshme të numrit të turistëve krahasuar me vitin e kaluar.
Çmimet e larta po krahasohen me ato të vendeve fqinje, dhe për shumë turistë të huaj, Ohri po del të jetë një destinacion gjithnjë e më pak konkurrues nga ana financiare. Ndërkohë, reagimet në rrjete sociale janë të shumta dhe të ndara: disa i quajnë çmimet të pajustifikueshme, ndërsa të tjerë mbrojnë tregun lokal, duke thënë se kush nuk ka mundësi, le të mos vijë.(INA)
