Masat qeveritare për përmirësimin e fuqisë blerëse të qytetarëve në Maqedoninën e Veriut tashmë kanë hyrë në fuqi, por çmimet për ushqimet bazë nuk do të ulen deri në fund të javës që vjen, gjegjësisht deri tek 17 marsi.
Autoritetet theksuan se javën që vjen shitësit kanë hapësirë që të azhurnojnë kasat e tyre fiskale dhe deri në fund të majit të fillojnë të shesin pa TVSH miell, bukë, vaj, sheqer, qumësht, mish, oriz dhe vezë, përcjell INA.
Nga Drejtoria e të Hyrave Publike bëjnë të ditur se tregtarët nuk kanë detyrim që fizikisht të vijnë tek zyrat e tyre dhe harmonizimi i kasave fiskale nuk do ti rëndojë financiarisht.
Brenda datës 17 mars ose të enjten e ardhshme, shitësit me pakicë duhet të përditësojnë arkën për të shitur ushqimet bazë të miratuara nga qeveria pa TVSH. Kjo do të thotë se qytetarët nuk duhet të presin produkte ushqimore më të lira deri të premten. (INA)
