“Atyre iu ka ik treni, ai çuni apo çuni plak i numëron ditët e fundit të atij cirku që po rrotullon në media, në rrjetet sociale, tik tok”, kjo ka qenë fjalia e Musa Xhaferit nga “Grupi i Zjarrit” i BDI-së në tubimin ditë më parë në Çair.
Për këtë porosi, zvkryeministri Artan Grubi ditë më parë theksoi se edhe zogjtë e malit e dinë se këto mesazhe janë të dërguara drejtpërdrejt për Ali Ahmetin e jo Artan Grubit.
Por kësaj deklarate i është përgjigjur Musa Xhaferi përmes një prononcimi në gazetën “Sloboden Pecat” , përcjell INA.
“Artan Grubi e di se për kë e kam fjalën kur them se atij çunit plak i ka ik treni dhe i numëron ditët e fundit, se Ali Ahmeti nuk bën selfie dhe Tik Tok”, deklaroi Musa Xhaferi, një nga drejtuesit e “Zjarrit” dhe kryetar i këshillit mbikëqyrës i BDI-s.
Sipas tij, nëse Grubi do që t’i kthejë gjërat, të vërë gjithçka në llogarinë e Ahmetit dhe të hedhë benzinë në zjarr, nuk është detyra ime të shpjegoj.
“Deklarata nuk i referohej Ahmetit. Grubi e di që e ka fjalën për të, por do të bëjë sikur e kam fjalën për Ahmetin. Është për të ardhur keq, por e kuptoj, është politikë. Ahmeti nuk merret me selfie dhe Tik Tok. Dhe, unë them çuni, çuni plak se Grubi është 46 vjeç”, thotë Xhaferi.
Ai i thotë Grubit le “të drejtojë cirkun derisa ka audiencë”, dhe për Ahmetin ka vetëm një pyetje: “Pse Ahmeti lejon Grubin që të sillet si bixhozxhi dhe të dëmtoj BDI-në, por edhe ate si kryetar partie”? (INA)
