Dani Olmo ka një lidhje të ngushtë me futbollin kroat, pasi kaloi vitet e para të karrierës së tij si profesionist te GNK Dinamo – por ai është spanjoll dhe këtë e ka bërë të qartë që para shtatë vitesh, siç ka zbuluar së fundmi.
Sipas GQ (përmes MD), Olmo ka treguar se Federata Kroate e Futbollit e kontaktoi para Kupës së Botës 2018 për ta natyralizuar, por ai refuzoi, duke zgjedhur të priste mundësinë e tij me “La Roja”, e cila erdhi një vit më vonë.
“Jam spanjoll dhe gjithmonë e kam ndjerë kështu. Kroacia donte të më natyralizonte për Kupën e Botës 2018. Ndoshta do të më ofronin më shumë siguri, por e dija që mundësia ime do të vinte nga Spanja.
Kur i pashë duke arritur në finale kundër Francës, u gëzova shumë, por kurrë nuk mendova se do të duhej të isha atje apo se ndoshta kisha bërë një gabim. Kisha luajtur me U21 dhe ëndrra ime ishte të vishja fanellën e Spanjës – një Kupë Bote nuk mund ta ndryshojë këtë.”
Olmo foli gjithashtu për vendimin që mori kur ishte te La Masia për të lënë Barcelonën dhe për t’u transferuar te Dinamo.
Ai e pa një mundësi shumë më të mirë në Kroaci sesa të qëndronte, dhe në fund ky vendim rezultoi i suksesshëm, pasi verën e kaluar u rikthye në Katalonjë.
“Kur Dinamo erdhi për mua, unë po kaloja nga ekipi i kadetëve te ai i të rinjve. Normalja do të kishte qenë të qëndroja ose të shkoja në një ekip në Angli, por ëndrra ime ishte të luaja për Barcelonën.
Në atë kohë, nuk e ndjeja që klubi do të kishte besim tek unë në të ardhmen. Dinamo më bindi me një projekt afatshkurtër dhe afatmesëm, stërvitesha me profesionistë dhe e dija që ishte vendimi më i mirë për mua.”
