Një rrëfim i pazakontë është bërë publik nga një prej figurave kryesore të konfliktit të vitit 2001 në Maqedoni, Xhezair Shaqiri – Komandant Hoxha. Në një postim të tij në rrjete sociale, ai zbulon se në fillimet e konfliktit, në zonën e Tanushës, kishte qëndruar për një vizitë të shkurtër dhe të fshehtë ish-Sekretari Amerikan i Mbrojtjes, Donald Rumsfeld.
Sipas tij, kjo vizitë është zhvilluar në një moment kritik të përplasjes mes Ushtrisë Çlirimtare Kombëtare (UÇK) dhe forcave qeveritare maqedonase. Komandant Hoxha shkruan se “prezencën e Rumsfeld-it në Tanush e dinin vetëm UÇK-ja dhe diplomacia amerikane”, duke nënkuptuar karakterin e klasifikuar dhe delikat të kësaj vizite.
“A e dini që politikani amerikan Donald Rumsfeld në vitin 2001 ka qenë në Tanush? A din kush të tregojë cili ka qenë misioni i tij? Prezencën e tij e dinë vetëm UÇK-ja dhe politika amerikane.” – ka shkruar Shaqiri në postimin e tij.
Kjo deklaratë hedh dritë mbi rolin e drejtpërdrejtë të diplomacisë dhe politikës amerikane në monitorimin e zhvillimeve në terren gjatë konfliktit në Maqedoni. Vizita e një zyrtari të rangut më të lartë të Pentagonit në një zonë lufte në Ballkan, dhe pikërisht në shtabin apo territorin e kontrolluar nga UÇK-ja, flet shumë për pozicionin e SHBA-ve në atë kohë.
Kjo është hera e parë që një fakt i tillë bëhet publik dhe vjen si dëshmi e një prej protagonistëve kryesorë të konfliktit, duke nxitur interesin për një rishikim të rolit real të fuqive të mëdha në zgjidhjen e krizës së vitit 2001 në Maqedoni. (INA)
