ANGLI – Fillimi zhgënjyes i karrierës së Alexander Isak te Liverpooli u përball me një tjetër pengesë kur ai pësoi një dëmtim në ijë në fitoren e Ligës së Kampionëve ndaj Eintracht Frankfurt.
Sulmuesi suedez, i cili u transferua nga Newcastle për një shumë rekord britanike prej 125 milionë paundësh (170 milionë dollarë) në fund të afatit kalimtar të verës, u tërhoq në pushimin e pjesës së parë të fitores 5-1 të mërkurën.
Ishte dëmtimi i dytë brenda natës për Liverpoolin, me mbrojtësin e djathtë Jeremie Frimpong që ishte larguar tashmë në mes të pjesës së parë për shkak të një problemi në kofshë.
Isak ka qenë duke e përmirësuar formën e tij në javët e fundit, pasi është stërvitur larg skuadrës kryesore të Newcastle në ndeshjet parasezonale, ndërkohë që ka pritur me padurim transferimin te Liverpool. Ai ka shënuar vetëm një gol në tetë ndeshje në të gjitha garat për klubin e tij të ri.
Trajneri i Liverpoolit, Arne Slot, tha javën e kaluar se vetëm tani Isak mund të gjykohet drejtësisht, duke pasur parasysh parasezonin e trazuar të lojtarit.
“Le të shpresojmë se nuk është aq keq, por ai duhej të largohej sepse e ndjeu ijën”, tha Slot. “Shumë njerëz donin që ai të luante më shumë dhe ne të gjenim ekuilibrin, por për fat të keq sot ky ekuilibër nuk funksionoi në mënyrë perfekte për ne. Por le të shpresojmë për më të mirën”.B.T (Dosja.al)
