Deputeti i Lëvizjes BESA, Fadil Zendeli i është kundërpërgjigjur akuzave të kryeparlamentarit, Talat Xhaferi.
“Deklarimet e Kryetarit të Kuvendit z.Talat Xhaferi se opozita bën obstruksion në komisionin për zgjedhje dhe emërime, ku unë si deputet jam edhe anëtar i këtij komisioni, i cilësoj si ikje nga përgjegjsia e shumicës parlamentare dhe mos-pasje vullnet për të ulur dhe bashkëbiseduar për çështje të cilat janë në interes të qytetarëve dhe të shtetit.
Apeloj deri te z.Xhaferi të jetë korrekt në prononcimet e tij dhe mospasjen e vullnetit politik për kompromis me opozitën, mos e arsyetojë me gjoja bllokada dhe opstruksione nga ana e opozitës”, theksoi Zendeli, përcjell INA.
Sipas tij, kryeparlamentari Xhaferi i ka të gjitha autorizimet normative që të thirrë mbledhje të Komisionit për Zgjedhje dhe Emërime, por ai këtë nuk e bën?!
“Unë jam deputet me përvojë në kuvendin republikan me punën dhe angazhimin tim politik kam treguar pjekuri dhe vizion për marrjen e vendimeve të rënda politike. Jam anëtarë i Komisionit për zgjedhje dhe emërime në dy përbërje parlamentare dhe kam qenë i hapur dhe konstruktiv në vendimarrjen dhe funksionimin e këtij komisioni.
Edhe njëherë ritheksoj se për gjithçka që është në interes të qytetarëve, në rrugën europiane të vendit, mirëfunksionimin e institucioneve publike ne jemi të gatshëm të ulemi dhe bisedojmë, por nuk do të bëhem vegël dhe instrument I politikave të dështuara të dyshes LSDM-BDI”, nënvizoi Zendeli.(INA)
