Shkruan: Xhevdet Mazrekaj
Sot dështoi formimi i Qeverisë së re të Kosovës. Por ky dështim nuk është rastësi — është vazhdim i një skenari që e kam paralajmëruar gati një vit më parë, në shkrimin tim të 1 dhjetorit 2024:
“A do të izolohet Albin Kurti nga Rama dhe opozita e bashkuar?”
Sot ajo që kam shkruar po ndodh pikë për pikë.
Pas këtij dështimi qëndron një lojë e orkestruar nga Beogradi, me ndihmën e Edi Ramës dhe me zbatimin e opozitës së bashkuar në Prishtinë. Qëllimi është i qartë: t’i tregohet opinionit ndërkombëtar se shqiptarët nuk janë në gjendje të qeverisin vetë dhe se Kosova është shtet i paqëndrueshëm.
Kjo është e njëjta logjikë që Serbia e ka përdorur për dekada: nëse shqiptarët nuk arrijnë të krijojnë qeveri, atëherë duhet ndërhyrë nga “të tjerët”.
E trishtueshme është që opozita e di këtë dhe megjithatë e ndihmon skenarin serb – vetëm për përfitime politike. Nuk ka logjikë tjetër pse LDK të refuzojë bashkëqeverisjen, nga e cila vetëm do të fitonte. Përkundrazi, duke u vënë në një linjë me parti që dikur janë akuzuar për vrasjen e personaliteteve të saj, ajo e ka humbur çdo busull morale.
Nga ana tjetër, Edi Rama, përmes ndikimit të tij mbi opozitën dhe mediave të lidhura me Tiranën e Beogradin, ka arritur të krijojë një front të përbashkët kundër Kurtit. Synimi i tij nuk është stabiliteti i Kosovës, por dobësimi i saj — për ta bërë më të lehtë realizimin e projektit të vjetër: ndarjen e Kosovës dhe kontrollin e veriut.
Kjo është arsyeja pse Beogradi dhe Tirana zyrtare janë sot më të kënaqurat me dështimin në Kuvend. Ata do ta përdorin këtë situatë për të thënë se “Kosova është e papjekur” dhe “duhet ndihmuar” përmes marrëveshjeve të reja që cenojnë sovranitetin.
Në fakt, humbësi i vërtetë nuk është Albin Kurti — është Kosova.
Sepse sot u rrëzua jo një qeveri, por ideja e përgjegjësisë shtetërore.
Nëse vendi shkon sërish në zgjedhje, ato nuk do të jenë zgjedhje të zakonshme, por një referendum i heshtur:
a do të votojnë qytetarët për Kosovën, apo për ndarjen e saj?
