Ministria e Punëve të Brendshme ka dhënë detajet e para lidhur me të shtënat me armë në Qendrën Tregtare “East Gate” në Shkup.
Dy të plagosur është bilanci i një incidenti me armë në qendrën tregtare “East Gate” në Shkup. Sipas një njoftimit të policisë, sot është raportuar se ka pasur të shtëna me armë në garazhin e kësaj qendre tregtare, ku është shtënë ndaj dy personave, të cilët janë plagosur rëndë.
Rade Trajkovski i njohur si Shtekli është personi ndaj të cilit është qëlluar me armë zjarri në garazhin e “East Gate”, përcjell INA. Ndërsa personi i dytë i plagosur është një mik i afërt i Shteklit, i cili është në gjendje rreziku për jetë, për shkak të plagëve të rënda. Ata para incidentit bashkërisht ishin në palestrën e kësaj qendre tregtare.
Emrat e dy personave të përfshirë në këtë incident lidhen edhe me vrasjen e futbollistit të ri, Martin Janushev, dhe me trukime të ndeshjeve të futbollit. Ky është incidenti i dytë me armë në këtë qendër tregtare, pas atij që ndodhi në gusht të këtij viti. (INA)
