Një zjarr masiv sot pasdite ka përfshirë fabrikën e njohur të bukës “Zhito Manastir” një gjigant i njohur edhe gjatë ish-Jugosllavisë.
Lidhur me zjarrin ka informuar edhe Ministria e Brendshme, duke dhënë detaje se nuk ka të lënduar, përveç dëme materiale.
“Më datë 23.01.2022 në ora 17.20 në SPB Manastir është raportuar se ka zjarr në fabrikën e bukës që ndodhet në pjesën industriale të Manastirit. Menjëherë janë dërguar ekipet e njësitit të zjarrfikësve në Manastir dhe zyrtarë policorë, nndërsa janë marrë masa për shuarjen e zjarrit. Deri më tani nuk raportohet për të lënduar. Punonjësit e policisë në koordinim me njësinë territoriale të zjarrfikësve në Manastir janë duke ndërmarrë masa intensive për shuarjen e zjarrit”, thuhet në njoftimin e MPB-së.
Siç mësohet në operacionin e shuarjes së zjarrit janë përfshirë mbi 20 automjete zjarrfikëse.
Në kohën që ka shpërthyer zjarri dy bukëpjekës kanë qenë duke punuar në objekt.
Sipas informacioneve të TV21, zjarri ka rënë në pjesën ku mbaheshin thasët e letrës të mbushura me miell, nga të cilat do të prodhohej bukë dhe brumëra gjatë mbrëmjes.
Nga Spitali Klinik në Manastir thonë se dy ekipe janë gatishmëri, por deri më tani nuk raportohet për të lënduar. (INA)
