Ky filmim tregon momente nga flakët që përfshinë mbrëmjen e të shtunës një limuzinë luksoze, që është pjesë e flotës zyrtare të presidentit rus Vladimir Putin.
Vetura Aurus Senat shpërtheu papritur në flakë në rrethana misterioze në një rrugë pranë selisë së agjencisë ruse të zbulimit FSB në Moskë.
Pamjet e shpërthimit u shpërndanë menjëherë në rrjetet sociale, ku u hodhën dyshime fillimisht për një atentat të mundshëm ndaj shefit të Kremlinit, në një kohë kur Vladimir Putin është përfshirë në bisedime me Shtetet e Bashkuara për fundin e luftës në Ukrainë.
Aurus Senat është markë ruse e prodhimit të automjeteve dhe vetura e përfshirë nga flakët arrin një vlerë prej mbi 300 mijë eurosh.
