Roberto Mancini largohet nga pankina e kombëtares italiane. Trajneri ka vendosur të japë dorëheqjen. Hapi i tij mbrapa vjen vetëm pak ditë pas vendimit të FIGC-së për t’ia besuar postin e koordinatorit të të gjitha ekipeve kombëtare. Njoftimi zyrtar erdhi me një deklaratë në faqen e internetit të FIGC.
Roberto Mancini i ka dërguar një letër federatës për të sqaruar vendimin e tij. Federata Italiane e Futbollit (FIGC) njofton se ka marrë parasysh dorëheqjen e Roberto Mancinit nga posti i trajnerit të kombëtares italiane, të marrë në dorëzim të shtunën vonë.
Kështu përfundon një faqe e rëndësishme në historinë e axurrëve, e cila filloi në maj 2018 dhe përfundoi me finalet e Ligës së Kombeve 2023. Në mes, fitorja e “Euro 2020”, një triumf i papritur, por i merituar i një grupi lojtarësh ku të gjithë individët kanë ditur të bëhen ekip.
Duke marrë parasysh angazhimet e rëndësishme dhe të ngjeshura për kualifikueset e “Euro 2024” (10 dhe 12 shtator me Maqedoninë e Veriut dhe Ukrainën), FIGC do të komunikojë emrin e trajnerit të ri kombëtar në ditët në vijim.
Trajneri i ri – Lajmi për dorëheqjen e papritur të Roberto Mancinit si trajner i kombëtares e ka tronditur futbollin italian si një tërmet, me tifozët axurrë që tani pyesin se kush do ta marrë trashëgiminë e tij në krye të një Italie që është kthyer nga dështimi për t’u kualifikuar në Kupën e Botës 2022 dhe që synon kualifikimin në finalet e Kampionatit të ardhshëm Europian.
Një objektiv i rëndësishëm për të gjithë lëvizjen futbollistike italiane, ndaj është e natyrshme të mendohet për dy profile eksperience dhe personalitete si Luciano Spalletti e Antonio Conte në “pole” për të zëvendësuar Mancinin.
Toskani është i freskët nga titulli historik i fituar me Napolin dhe mund të vendosë ta ndërpresë vitin e tij të pushimit për të përjetuar një aventurë të re magjepsëse, ndërsa trajneri salentin vjen nga lamtumira e tij me Tottenhamin. Për të do të ishte rikthim në kombëtare.
Nëse në vend të kësaj federata vendos të fokusohet te një trajner i ri ose në çdo rast te një ish-axurr, ka disa profile të pranueshme, si kampionët e botës Daniele De Rossi, Fabio Cannavaro dhe Filippo Inzaghi. Më pas janë teknikë me përvojë ndërkombëtare si Gennaro Gattuso, Vincenzo Montella, Gianfranco Zola dhe Andrea Stramaccioni.
