Me buqeta në dorë, bashkë me prindërit e tyre të kapur për dore, fatosët e shkollës fillore “Vizbeg” po nisin një rrugëtim të ri, atë edukativ.
Sot është dita e parë si për nxënësit, ashtu edhe për vet shkollën, kjo për shkak se shkolla fillore “Vizbeg” për herë të parë lëshohet në përdorim për banorët e Vizbegut. Për hapjen e shkollës, të gëzuar ishin prindërit që kanë regjistruar fëmijët e tyre në klasë të parë, por edhe të tjerët të cilët kanë dërguar fëmijët e tyre në shkolla tjera në Çair, Butel e Shuto Orizare. Për TV21, shprehën kënaqësinë dhe rëndësinë e hapjes së kësaj shkolle.
E ata që gëzohen më së shumti, padyshim që janë fëmijët. Të emocionuar, tregojnë se çka kanë mësuar deri tani dhe a do të jenë nxënës të shkëlqyeshëm.
Ndonëse shkolla është gati për përdorim, megjithatë mësimi nuk fillon prej sot. Kjo përshkak se mungon kuadër mësimdhënës. Drejtori i shkollës fillore “Vizbeg”, Kadri Elezi, njofton se ministria e Arsimit dhe komuna e Butelit shumë shpejtë do të hapin konkursin për pranimin e kuadrove të reja, ndërsa nevojiten diku rreth 21 mësimdhënës.
Drejtori Elezi njofton se në klasë të parë janë regjistruar 48 nxënës por presin të regjistrohen edhe disa të tjerë. Sivjet, mësimin do të ndjekin nxënësit nga klasa e parë deri në të pestën.
Shkolla Fillore “Vizbeg” ka kapacitet për 500 nxënës, të cilët duhet të shpërndahen në 17 paralele.
