Vetëm për tre muaj në Gostivar 32 çifte i kanë dhënë fund martesës duke u shkurorëzuar.
Kjo në bazë të të dhënave nga Enti i Statistikave të Maqedonisë, përcjell agjencia e lajmeve INA.
“Sipas të dhënave të Entit Shtetëror të Statistikës, gjatë tremujorit të dytë të vitit 2024, komuna e Gostivarit udhëheq përsa i përket divorceve.
Nga gjithsej 82 martesa të lidhura për këtë periudhë kemi, as më pak e as më shumë se 32 raste divorci, fenomen që ka filluar të bëhet shqetësues në mesin e shoqërisë sonë.”, deklaron Ridvan Ismaili, i punësuar në Entin e Statistikave.
Trendi i divorcit nuk është vetëm në vendin tonë. Rajoni dhe Evropa përballen me këtë trend e që po e shkakton edhe probleme të tjera përcjellëse.
Sociologët shprehen se një lloj emancipimi duke e përdorur këtë term në aspektin negativ, ka bërë që të kemi rritje të rasteve të divorcit.
Disa nga faktorët tjerë janë, martesat e hershme, kushtet e rënda ekonomike, rrjetet sociale… etj.(INA)
