Prokuroria e Shkupit ka ngritur aktakuzë në Gjykatën penale kundër Arianit Xhaferit, djalit të ish-zv/kryeministrit Musa Xhaferit, për sulmin ndaj kryetarit të Komisionit Rregullativ për Energji (KRRE), Marko Bislimovski.
Ai po procedohet për veprën penale të dhunës, shkruan FOKUS.
Arsyeja e sulmit siç thuhet ishte se kompania e tij “U-Power” ishte në listën e KRRE-së për revokimin e licencave, pasi nuk i furnizonte mjaftueshëm me energji elektrike të nevojshme konsumatorët me të cilët kishte lidhur kontrata.
Organi rregullativ informon se procedura është ende në vazhdim dhe KRRE deri më tani nuk i ka hequr ende licencën kësaj kompanie.
Ata theksojnë se kjo është një procedurë e gjatë dhe se qëllimi i saj është korrigjimi i sjelljes së furnizuesve të energjisë elektrike, dhe jo heqja e licencës, për të mos prishur sistemin energjetik, në kohë krize të mëdha ekonomike.
Sipas informacioneve të fundit nga atje, kompania nuk prokuron fare energji elektrike.
“Ju informojmë se U Power më 31 janar të këtij viti e ka njoftuar ERC-në me email se nuk ka konsumatorë që furnizon me energji elektrike në shkurt të vitit 2022 dhe për këtë arsye nuk është blerë energji”, është përgjigja nga KRRE./FOKUS
