Dogana e Maqedonisë së Veriut ka ndaluar dhe konfiskuar një minibus në vendkalimin kufitar Tabanoc, pasi që tek ai u gjet një bunker i posaçëm në sistemin e ventilimit për fshehje malli.
Sipas doganës, minibus është me targa të Shqipërisë dhe se ai po kryente transport të udhëtarëve në linjën Tiranë – Bruksel, përcjell INA.
Rasti është zbuluar në hyrje të vendkalimit kufitar Tabanoc nga inspektorët doganor të ekipit mobil të Departamentit për kontroll dhe hetim. Pas kallëzimit në gjykatën kompetente, ajo ka marrë vendim për konfiskimin e automjetit, ndërsa shoferit të mjetit i është shqiptuar gjobë për shkak të shkeljes së nenit 263 paragrafi 7 dhe nenit 269 paragrafit 2 të Ligjit për Dogana.
Ky është rasti i dytë brenda një jave i sekuestros së një automjeti të konstruktuar, përshtatur posaçërisht për fshehjen e mallit. Nga Drejtoria doganore thonë se vazhdojnë të veprojnë në kuadër të kompetencave të tyre në drejtim të mbrojtjes së interesave financiare të shtetit dhe mbrojtjes së sigurisë dhe shëndetit të qytetarëve.(INA)
