Mbi 6000 qytetarë të Maqedonisë së Veriut kanë shprehur interesin e tyre për të ndërtuar të ardhmen përmes vetëpunësimit, duke aplikuar në thirrjen e hapur nga Ministria e Ekonomisë dhe Punës në bashkëpunim me Agjencinë për Punësim të Maqedonisë së Veriut.
Aplikantët përfshijnë të rinj, të reja, gra dhe burra të vendosur për të nisur biznesin e tyre dhe për të krijuar vende të reja pune. Ky numër i lartë aplikimesh është një dëshmi e fortë se qytetarët kanë besim në politikat publike që synojnë mbështetjen e ndërmarrësisë dhe zhvillimit ekonomik të qëndrueshëm.
Përmes këtij programi, Qeveria jo vetëm që mbështet idetë novatore dhe iniciativat private, por kontribuon në fuqizimin e barazisë gjinore, promovimin e punësimit të të rinjve dhe zhvillimin rajonal.
Ministri Durmishi theksoi se interesi i madh për programin është tregues i fryteve të para të reformave të ndërmarra dhe i përkushtimit të institucioneve për të qenë pranë qytetarëve që ndërmarrin hapa të guximshëm drejt vetërealizimit dhe zhvillimit ekonomik.
“Qeveria është krah për krah me qytetarët e saj – me ata që kanë ide, kurajë dhe vizion për të sjellë ndryshim në jetën e tyre dhe në komunitet”, shkroi ministri Durmishi.
Maqedonia e Veriut po ecën përpara me mbështetjen ndaj inovacionit dhe iniciativës individuale, duke ndërtuar një ekonomi moderne dhe gjithëpërfshirëse.
