Prokuroria Themelore Publike Shkup ka ngritur procedurë penale ndaj një 23-vjeçari, i dyshuar për kryerjen e një vjedhjeje të rëndë me dhunë në një banesë në rrugën “Vostaniçka” në Shkup më 2 janar 2024.
Sipas njoftimit të Prokurorisë, i dyshuari ka hyrë në shtëpi duke përdorur dhunë, konkretisht u ngjit në ballkonin e katit të parë me ndihmën e një tavoline plastike dhe ka hapur me forcë një dritare. Pas kontrollit të dhomave, ai ka vjedhur bizhuteri, gjashtë orë dore, dy laptopë, sende të tjera me vlerë, si dhe para të gatshme në shumën prej 1,000 euro.
Pas kryerjes së vjedhjes, i dyshuari është larguar përmes një dere anësore dhe ka arritur të shmangë kapjen nga policia për më shumë se një vit.
Duke pasur parasysh rrezikun e arratisjes së përsëritur, si dhe faktin që ndaj tij rëndojnë akuza të tjera penale, prokurori publik ka propozuar caktimin e masës së paraburgimit ndaj tij.
