Enver Robelli
Në këtë fotografi shihet Srđan Golubovići, një kriminel serb duke goditur civilët e vrarë në Bijelinë të Bosnjës më 1992. Srđan Golubovići kurrë s’ka dalë para drejtësisë. Punon si DJ nëpër Serbi. Argëton miletin me muzikë. Një kriminel lufte. Kjo është Serbia e vitit 2022.
Por me kaq nuk mbaron ky rrëfim.
Viktimat kanë emra. Ata quhen:
Ajša Šabanović
Abduraham Pajaziti
Hamijeta Pajaziti
Dy nga viktimat janë shqiptarë.
Siç kam dokumentuar në librin tim “Ratko Mladići dhe banaliteti i së keqes” ndër viktimat shqiptare në Bijelinë është edhe Hajrush Ziberi nga rrethina e Shkupit. Para se ta vrisnin, kriminelët i hodhën benzinë mbi kokë. Në Bijelinë forcat serbe vranë po ashtu vëllezërit Përparim e Vllaznim Rexhbeqaj, bukëpjekës nga Gjonaj i Prizrenit.
Këto ditë magazina e njohur amerikane “Rolling Stone” ka botuar një tekst të gjatë hulumtues ku dokumenton krimet e Srđan Golubovićit.
Për opinionin shqiptar mbesin disa pyetje:
1. Disa nga viktimat janë shqiptarë nga Maqedonia. A ka bërë diçka drejtësia e atjeshme për të ndjekur kriminelin Srđan Golubović?
2. Pse nuk ka bërë asgjë?
3. A kanë bërë diçka autoritetet e Kosovës për të denoncuar vrasësit e Përparim e Vllaznim Rexhbeqajt?
4. Gjysmën e qeverisë së Maqedonisë e kontrollojnë shqiptarët. Çka bëjnë këta njerëz?
5. Qeveria e Kosovës që nga shpallja e pavarësisë (me pak kufizime) kontrollohet nga shumica shqiptare. Çka kanë bërë e çka bëjnë këta njerëz për dokumentimin dhe denoncimin e krimeve?
6. Madje drejtësia maqedonase, për dallim nga ajo kosovare, nuk ka asnjë pengesë që kriminelët serbë t’i ndjekë deri në Gjykatën Europiane për të Drejtat e Njeriut. Edhe Shqipëria do të mund të bënte diçka. E vërteta e hidhur është kjo: si Shkupi si Tirana po bëjnë shumë: po ia shtrojnë qilimin e kuq Aleksandar Vuçiqit si asnjëherë më parë në historinë bashkëkohore. Të vrasësh shqiptarë duket se është biznes i pandëshkueshëm për kriminelët serbë si Srđan Golubovići.
