Kryetari i Kuvendit të Maqedonisë së Veriut, Talat Xhaferi, në një intervistë për agjencinë e lajmeve MIA, ka thënë se do ta ndjek vendimin e ministrave të Bashkimit Demokratik për Integrim (BDI) dhe ai do të largohet nga pozita e tij, nëse VMRO-DPMNE votojë për amendamentet kushtetuese.
“Rrjedhimisht, nëse të gjithë largohen, pse të insistoj të qëndroj”, tha kryeparlamentari Xhaferi.
Qëndrimi i Xhaferit është që zgjedhjet parlamentare të jenë të rregullta. I pyetur nëse zgjedhjet në një kohë të shkurtër do ta ndihmonin BDI-në që të arrijë të mbajë sa më shumë vota, ai thotë se autoritetet partiake duhet të bëjnë kalkulime për këtë.
“Me sa di unë, BDI ka deklaruar se mandati duhet të shkojë si mandat i rregullt dhe t’i kthehemi procesit dhe sistemit të mandatit katërvjeçar. Por vendimi i djeshëm i cili u shpall është në kuadër të rezultatit apo deklaratës së takimit të kryesisë mes kryeministrit dhe presidentit të opozitës”, thotë Xhaferi.
Kryetari i BDI-së, Ali Ahmeti dje në Facebook ka njoftuar se ministrat nga BDI kanë dhënë dorëheqje nga pozitat e tyre, por që hyjnë në fuqi pas votimit të amendamenteve kushtetuese nga VMRO-DPMNE.
Por, VMRO-DPMNE ka kërkuar që dorëheqjet e ministrave të BDI-së të jenë të parevokueshme dhe më pas të organizohen zgjedhje të shpejta të parakohshme parlamentare.(INA)
