Pesë ndërkombëtarë do të qëndrojnë paraditen e sotme (e premte) në Prishtinë në kuadër të përpjekjeve të vazhdueshme për të çuar përpara dialogun mes Kosovës dhe Serbisë. Të njëjtit, në orët e pasdites do të jenë në Beograd.
Gabriel Escobar, i dërguari i posaçëm i Shteteve të Bashkuara të Amerikës për Ballkanin Perëndimor, Miroslav Lajçak, përfaqësues special i Bashkimit Evropian për dialogun Kosovë-Serbi, Jens Plotner, këshilltar i kancelarit gjerman, Emmanuel Bonne, këshilltar i presidentit francez dhe Francesco Maria Talo, këshilltar i kryeministres italiane, është përbërja e delegacionit ndërkombëtar.
Të pesë diplomatët do të priten nga kryeministri i Kosovës, Albin Kurti, në ndërtesën qeveritare në ora 10:00.
Zëdhënësi i Bashkimit Evropian, Peter Stano, tha se gjatë kësaj vizite të këtyre ndërkombëtarëve do të diskutohen hapat e ardhshëm për normalizimin e marrëdhënieve ndërmjet Kosovës dhe Serbisë.
“Në Prishtinë ata do të takohen me kryeministrin Kurti dhe më pas në Beograd do të takohen me presidentin (Aleksandër) Vuçiq për të diskutuar hapat e ardhshëm për normalizimin e marrëdhënieve ndërmjet Kosovës dhe Serbisë. Dhe në këtë vizitë përfaqësuesi special i BE-së do të shoqërohet nga këshilltarët kryesorë të politikës së jashtme të presidentit francez, kancelarit gjerman, dhe kryeministres italiane, si dhe Zëvendësndihmës Sekretari amerikan Escobar.”, është shprehur Stano.
Ndryshe, i dërguari i posaçëm i BE-së për dialogun Kosovë-Serbi, Miroslav Lajçak, në Davos të Zvicrës ditë më parë zhvilloi takim me kryeministrin Albin Kurti dhe presidentin serb Aleksandër Vuçiq.
