Ish deputeti Bekim Fazliu, në një intervistë për gazetën LAJM, është shprehur i bindur se nëse bashkohen partitë opozitare, përfshirë edhe Aleancën për Shqiptarët, do ta fitonin BDI-në në zgjedhjet parlamentare.
Për takimin e Taravarit, Mexhitit, Kasamit dhe Gashit me kryeministrin kosovar Albin Kurti, Fazliu, tha se është diçka shumë normale dhe se takime të formatit të ngjashëm, në të kaluarën kanë realizuar edhe politikanët tjerë në Shkup, Tiranë e Prishtinë.
“Në zgjedhje do të vendosin qytetarët. Nëse ndodh bashkimi i opozitës shqiptare, unë besoj se do të fitojë opozita shqiptare. Në kampin maqedonas nuk e di, por kushdo që të fitojë shqiptarët mendoj se e kanë pastër dhe qartë drejtimin pro-evropian dhe aty janë vijat e kuqe që nuk guxojnë në këto që t’ia rrisin menden dikujt për aventura të ndryshme. Pozicioni ynë është i qartë dhe të gjithë jemi pro Evropës dhe pro SHBA-ve. Nuk kanë qare të tjerët pa e ndjekur këtë kurs”, tha ish-deputeti Bekim Fazliu në një intervistë për gazetën LAJM.
LAJM: Dje në Prishtinë liderët e opozitës shqiptarë nga maqedonia të shoqëruar nga kreu i ASH-së, Arben Taravari realizuan takim me kryeministrin kosovar Albin Kurti. Prisni që Taravari ti bashkohet opozitës shqiptare?
Bekim Fazliu: Ishte një takim që jemi mësuar të shohim edhe më herët takime të tilla. Takim normal sepse dinë opinioni gjërë se takime të tilla janë realizuar edhe në Tiranë me kryeministrin e Shqipërisë, ka pas të tillë edhe këtu me përfaqësues të kryeministrit të Shqipërisë, Kosovës. Është gjëja më normale që mund të ndodh. Vendimin duhet ta sjellin vetë ata. Unë uroj që të ndodh një gjë e tillë sepse besoj se një bashkim i partive opozitare shqiptare do të ishte në të mirë të gjithë procesit elektoral, nuk do të ndaheshin votat dhe do të kishim një garë mes dy blloqeve, në njërën anë do ta kishim BDI-në me partnerët e saj dhe në anën tjetër edhe partitë e bllokut opozitare dhe është një mundësi e mirë që shqiptarët përfundimisht mund ta çojnë BDI-në në opozitë nëse ndodh një bashkim i tillë.
