Profesori i mirënjohur universitar, Hysamedin Feraj sot ishte i pranishëm në Shkup me rastin e përurimit të rrugës me emrin e atdhetarit “Adem Demaçi” në komunën e Çairit.
Feraj në një prononcim për agjencinë e lajmeve INA ka folur për figurën e Demaçit si Mandela i shqiptarëve, duke thënë se ai duhet të jetë udhërrëfyes për të ecur të gjithë ne.
“Kjo nuk është thjeshtë rruga Adem Demaci, në fakt Adem Demaci është vet rruga, në të cilën nuk mjafton vetëm të shëtitet mbrëmjeve, por në të cilën duhet ecur. Shpresoj të jetë udhërrëfyesi sic ka qenë gjithmon për të ecur të githë ne. Prandaj edhe njëherë e theksoj se kjo nuk është rruga Adem Demaci, por Adem Demaci është rruga”, deklaroi profesori Feraj.
Ai ka komentuar edhe zhvillimet në Maqedoninë e Veriut dhe pozitën e shqiptarëve, duke vlerësuar se procesi nuk është duke ecur në rrugën e duhur.
“Zhvillimet në Maqedoni i shoh shumë të vakëta. Një pjesë e madhe e qytetarëve dhe vecanarisht shqiptarët i shoh të çorientuar. Do të dëshiroja të jenë më të kthjellët për fuqinë që kanë për të sjellë ndryshimin”, është shprehu Feraj. (INA)
