Ministri i Jashtëm turk, Hakan Fidan tha në Shkup se stabiliteti i Ballkanit është ndër prioritetet e Turqisë, duke shtuar se ky rajon është çelësi i sigurisë së Evropës.
Shefi i diplomacisë turke, Fidan, ndodhet për vizitë zyrtare në Maqedoninë e Veriut, ku u takua me ministrin e Punëve të Jashtme dhe të Tregtisë së Jashtme, Timço Mucunski.
“Zgjidhja e problemeve në rajon nuk mund të pritet vetëm nga aktorët e jashtëm, vendet e rajonit duhet të punojnë aktivisht për zgjidhjet”, tha Fidan në konferencën për shtyp.
Ai theksoi se vendi i tij po bën përpjekjet e nevojshme për të ofruar mbështetje për rajonin.
“Turqia merr pjesë aktive në tejkalimin e vështirësive në BeH dhe Kosovë nëpërmjet dialogut dhe bashkëpunimit. Ne as nuk duhet të mendojmë për dhunën dhe luftërat”, shtoi ai.
Duke u ndalur në ngjarjet në Lindjen e Mesme, Fidan vuri në dukje se brutaliteti në Gaza vazhdon ende, duke shtuar se tensionet janë përhapur edhe në Bregun Perëndimor dhe provokimet kundër Al-Aksës e përkeqësuan edhe më shumë situatën tashmë të tensionuar.
Ai paralajmëroi se ushtria izraelite nuk i ndal sulmet e saj në Rripin e Gazës. “Kryeministri izraelit Benjamin Netanyahu është personalisht më përgjegjës për gjenocidin në Gaza.
Netanyahu vazhdon të mbjellë vdekje dhe terror për hir të qëndrimit në pushtet. Netanyahu po saboton të gjitha përpjekjet për një armëpushim dhe vazhdon të shembet negociatat e armëpushimit duke imponuar vazhdimisht të reja kushte”, tha Fidan.
Ai theksoi se edhe publiku izraelit filloi të rebelohet kundër tij. “Komuniteti ndërkombëtar duhet të ndalojë Netanyahun. Heshtja për masakrën është sinonim i bashkëpunimit në këtë krim,” tha Fidan.
