Ende mbetet e pasigurt nëse propozim-ligji për Këshillin Gjyqësor do të dorëzohet në Kuvend gjatë muajit qershor, ndonëse tashmë është publikuar në platformën ENER. Ministri i Drejtësisë, Igor Filkov, shprehet se shpreson që deri në fund të muajit propozimi të hyjë në procedurë parlamentare, por më parë duhet të vlerësohet nga Komisioni i Venecias. Takimi me këtë institucion është parashikuar të mbahet sot, me pjesëmarrjen e grupit punues të Ministrisë së Drejtësisë.
“Po, kjo është më e rëndësishmja për ne – që ligji të jetë i çliruar nga ndikimet politike. Mbetet për t’u parë nëse do të jetë gati deri në fund të muajit. Shpresoj se do të jetë, pasi të arrijnë komentet nga Komisioni i Venecias, për të cilat kemi takim gjatë ditës së sotme”, deklaroi Filkov.
Rekomandimet e Komisionit të Venecias nuk janë detyruese, por pritet të shihen se cilat do të jenë dhe nëse do të përfshihen në versionin përfundimtar të ligjit. Propozimi aktual përfshin disa risi: përkufizim të qartë të termit “jurist i shquar”, zgjerim të kritereve për anëtarët e zgjedhur nga Kuvendi dhe detyrimin që shkarkimi i kryetarit të Këshillit Gjyqësor të zhvillohet në seancë publike.
Në debatin e fundit publik, ekspertët ngritën shqetësime për pjesëmarrjen e ministrit të Drejtësisë dhe kryetarit të Gjykatës Supreme në këtë organ, duke sugjeruar që kjo të mos jetë e domosdoshme. Filkov nuk dha detaje për ligjet e tjera në fushën e reformës në drejtësi, por informoi se disa prej tyre pritet të dorëzohen së shpejti në Kuvend.
Nga paketa prej tetë ligjesh me afat deri në qershor 2025, katër tashmë janë dorëzuar në Qeveri dhe po shqyrtohen me procedurë të shkurtuar: ligji për pagat e gjykatësve, i prokurorëve publikë, i anëtarëve të Këshillit Gjyqësor dhe i anëtarëve të Këshillit të Prokurorëve Publikë. Ndërkohë, një version i ri i Kodit Penal është parashikuar të miratohet deri në fund të vitit 2025.(INA)
