Gjykatës nga Komisioni i Venecias, profesorë dhe ekspertë vendas të enjten e ardhshme (20 mars) në seancën përgatitore në Gjykatën Kushtetuese do të shprehin mendimet e tyre për çështjet e diskutueshme ligjore të Ligjit për Përdorimin e Gjuhëve, gjegjësisht përdorimin e gjuhës shqipe në Maqedoninë e Veriut, përcjell INA.
Gjykatësi holandez Dr. Martin Kuijer, i cili është edhe nënkryetar i Komisionit të Venecias, do të shpjegojë këshillën miqësore që gjykata ka kërkuar prej tyre dhe duhet të miratohet nga komisioni.
Gjykatësi i Gjykatës për të Drejtat e Njeriut, Arthur Kuch, do të shpjegojë praktikën e kësaj gjykate në raste të ngjashme. Interpretimet e tyre do t’i japin ekspertët vendorë: ish-gjykatësa kushtetuese, Margarita Caca Nikolovska, anëtare e Komisionit të Venecias, Renata Deskoska, profesorët universitarë Borçe Davitkovski, Jeton Shasivari, Gordana Lazetiq, Mersel Bilalli, Denis Preshova, Mersim Maksuti, Merit Nuxhia, Nusret Bajramn dhe gjykatësit e përbërjes aktuale të Kushtetueses.
Të pranishëm do të jenë edhe iniciatorët e iniciativës, ndërsa një paraqitje online do të mbajë profesoresha Tanja Karakamisheva. Në seancë do të diskutohet vetëm për të drejtën materiale, pasi tashmë është mbajtur seanca për pjesën formale. Kryetari i Gjykatës Kushtetuese, Darko Kostadinovski nuk i zbuloi gjashtë çështjet e kontestuara, por tha se do të interpretohet amendamenti 5 i Kushtetutës. Për të është e rëndësishme që të dëgjohen të gjitha mendimet, dhe gjykata të marrë një vendim të drejtë dhe të bazuar në kushtetutë.(INA)
