Përgjegjësia për arratisjen e Blerim Ramadanit nga arresti shtëpiak duhet të kërkohet në institucionin që ka kryer mbikëqyrjen, thonë nga Gjykata Penale, përcjell TV21. Gjykata përmes një kumtese ka arsyetuar vendimin e gjyqtarit Pajazit Pajaziti për t’i shqiptuar Ramadanit arrest shtëpiak.
“Personi konkret ka qenë në paraburgim aktiv me vendim të gjyqtarit të procedurës paraprake nga data 17.07.2024 deri më 01.08.2024, ose 15 ditë, pra sipas praktikës së mëparshme gjyqësore për këto raste, kjo është koha maksimale që një personi e ka kaluar në paraburgim ekstradues”, thonë mes tjerash nga Gjykata Penale.
Nga Gjykata shtojnë se Pajaziti gjatë sjelljes së vendimit për paraburgim shtëpiak i ka marrë parasysh faktet se në raste identike janë sjellë aktgjykime se nuk janë plotësuar kushtet për ekstradim.
“Gjykata Penale solli vendim sipas të cilit nuk janë plotësuar kushtet ligjore për ekstradim dhe e gjithë lënda i është dhënë Gjykatës Supreme të RMV-së për të vepruar më tutje”, shtojnë nga Gjykata Penale, nga ku kërkuan që rasti të mos përdoret për përplasje politike.
