Zv/kryeministri, Artan Grubi deklaroi se, në kuadër të vizitës zyrtare në Republikën e Bullgarisë kanë realizuar takim edhe me presidentin bullgar, Rumen Radev.
“Presidenti Radev përshëndeti realizimin e sotëm të seancës së përbashkët mes qeverive tona dhe hapat e ndërmarra për avancimin e bashkëpunimit që epilog duhet të kenë standard më cilësor jetese të qytetarëve të të dyja vendeve, zgjidhje të kontestit dhe integrim të Maqedonisë së Veriut në Bashkimin Europian”, u shpreh Grubi.
Autoritetet e Sofjes dhe Shkupit vendosën të përmirësojnë marrëdhëniet e dëmtuara të biznesit me Bullgarinë duke lehtësuar kushtet për bashkëpunim.
Në takimin ndërmjet delegacioneve të Maqedonisë dhe Bullgarisë, është rënë dakord që të themelohet Sekretariati për tregti, me qëllim të përmirësimit të nivelit të tregtisë.
Krahas tregtisë, ministrat në fushën e ekonomisë ranë dakord që të thellohet bashkëpunimi në fushën e turizmit, energjetikës dhe të eliminohen disa nga procedurat e deritanishme burokratike të nevojshme për punë.
(INA)