Grubi porosi Mickoskit dhe Apasievit: Sa më parë të këndellen duke kuptuar se shqiptarët në këtë vend janë të barabartë
Zëvendëskryeministri i parë i Qeverisë së Maqedonisë, Artan Grubi i është përgjigjur reagimeve të opozitës maqedonase rreth dekretit qeveritar që mundëson përdorimin e gjuhës shqipe në uniformat e policisë.
Reagimi i Grubit vjen pas reagimeve të mbrëmshme të kreut të VMRO-DPMNE, Hristijan Mickoski ndaj vendimit qeveritar, por edhe të atij të së “Majtës”, Dimitar Apasiev, përcjell INA.
“Është për të ardhur keq në veçanti nga opozita, e cila akoma vijon të shfaq kundërshtimet ndaj Marrëveshjes së Ohrit, gjuhës shqipe, ndaj barazisë dhe ndaj shqiptarëve.
Dhe në të vërtetë është për të ardhur keq se më përpara e shohin në gjuhën angleze të shkruar në uniformën e policisë, vetëm se u pengon gjuha shqipe. Por ajo nuk u pengon, por u pengon gjuha shqipe. Dhe vlerësoj që të këndellen ditë më parë duke kuptuar se shqiptarët në këtë vend janë të barabartë me ta dhe gjuha shqipe është e barabartë sipas ligjit”, theksoi për Klan Maqedoni, zëvendëskryeministri Grubi.
Sipas tij, dekreti absolutisht do të realizohet dhe tani bëhen përgatitjet në MPB për uniformat e reja me shkrimin shqip.
https://www.facebook.com/watch/?v=482840630173991
