Me një peticion online, “Grupi i Zjarrit” i BDI-së thotë se do të nisë tentativën për shkarkimin e Artan Grubit dhe ministrave të tjerë nga radhët e BDI-së.
Kështu ka bërë të ditur dje përfaqësuesi i këtij grupimi, Izet Mexhiti, pas takimit me qytetarët, për të cilin tha se ka treguar një numër të madh të njerëzve të pakënaqur me BDI-në.
“Sot është një peticion. Nesër dhe pasnesër me siguri do të ketë mekanizma të tjerë demokratikë. Ne jemi me përvojë në politikë, jemi çdo ditë me qytetarët dhe do të gjejmë mënyrën për të fituar edhe këtë herë. Fillimisht thanë se vetëm dy-tre ishin të pakënaqur, pastaj doli vetëm tek Çairi dhe Saraj. Tani po shohim se në Tetovë dhe kudo populli, votuesit, struktura janë të pakënaqur me qeverisjen e Grubit dhe të tjerëve”, theksoi Mexhiti mbrëmë në Tetovë.
Sipas tij, anëtarët e BDI-së që nuk pajtohen me punën e ministrave në Qeveri kanë presione të ndryshme. Ai pohon se disa tashmë kanë marrë dorëheqjet, e disa janë nën presion me kontrolle dhe inspektime të ndryshme.
Sipas “Grupit të Zjarrit”, tanimë kanë dalë me fushatën “Po vjen” për të defokusuar opinionin.(INA)
