Presidentes Gordana Siljanovska Davkova do t’i duhen edhe disa ditë për të vendosur mbi propozimin e guvernatorit të ri të Bankës Popullore. Ajo thotë se arsyeja e diskutimeve rreth përzgjedhjes së guvernatorit qëndron në faktin se të gjithë kandidatët janë profesionistë me biografi të pasur.
“Arsyeja është biseda ime me tre kandidatët. Të gjithë janë të shkëlqyer. Më prezantuan me atë që kanë bërë në jetë me biografitë e tyre, do t’i dorëzojnë, kur flet me secilin prej tyre për më shumë se një orë e një orë e gjysmë, je në dilemë të madhe. Kjo është arsyeja pse i informova ata, publikun dhe parlamentin. Pas konsultimeve shtesë, do të dorëzoj propozimin përfundimtar”, tha Gordana Siljanovska Davkova, Presidente.
Kryeministri Hristijan Mickoski thotë se do të flasë me presidenten dhe këtë javë propozimi për zgjedhjen e guvernatorit të ri të Bankës Popullore do t’i dërgohet parlamentit.
“Unë supozoj se do të duhet të takohemi përsëri në ditët në vijim, të flasim dhe pastaj jam i sigurt se deri në fund të javës ose brenda kësaj jave, zyra e presidentes duhet të japë përgjigje se kur do të dërgohet propozimi për guvernator të ri”, tha Hristijan Mickoski– Kryeministër .
Guvernatorja aktuale Anita Angellovska-Bezhoska thotë se sipas ligjit, ajo do të mbetet në detyrë derisa të zgjidhet guvernator i ri. Ndërsa ajo u përmbajt nga komentimi i pyetjeve në lidhje me zgjedhjen e guvernatorit të ri.
“Shikoni, sipas rregulloreve ligjore ekzistuese, pra nenit 55 të ligjit, kjo çështje rregullohet në mënyrë që të mos ketë mospërputhje pas kryerjes së një funksioni kaq të rëndësishëm publik. Prandaj, ju kërkoj të kuptoni, por në këtë fazë do të përmbahesha nga çdo koment në këtë drejtim, faleminderit”, u shpreh Anita Angellovska Bezhoska – Guvernatore e Bankës Popullore.
Mandati i Guvernatores aktuale skadon nesër, por nuk ka pengesa ligjore që ajo të vazhdojë në detyrë derisa të zgjidhet guvernator i ri ose ajo të rizgjidhet. Zgjedhja e guvernatorit bëhet në Kuvend me 61 vota./Alsat.mk
