Hamasi deklaroi se qeverisja e Rripit të Gazës është çështje e Palestinës dhe se asnjë fuqi nuk do të jetë në gjendje ta ndryshojë këtë fakt, transmeton Anadolu.
Zëdhënësi i Hamasit, Abdullatif Kanu, në një deklaratë në faqen e tij në Telegram tha: “Qeverisja e Gazës ose një pjesë e tokës tonë është çështje e popullit tonë, Palestinës, dhe asnjë forcë në terren nuk mund ta ndryshojë këtë fakt ose të imponojë vullnetin e vet”.
Duke komentuar deklaratën e koordinatorit të Komunikimeve Strategjike të Këshillit të Sigurisë Kombëtare të Shtëpisë së Bardhë, John Kirby, se Hamasi nuk mund të jetë pjesë e ekuacionit në të ardhmen e Rripit të Gazës dhe se konsultimet për formën e qeverisjes atje po vazhdojnë, Kanu tha: “Fjalimi i Kirby-t për periudhën e pas-Hamasit në Gaza nuk ishte gjë tjetër veçse një ëndërr dhe se populli palestinez është i bashkuar me forcat e rezistencës dhe përcaktoi fatin e tij”.
Kanu tha se Hamasi është lëvizje nacionalçlirimtare dhe pjesë integrale e popullit palestinez dhe se ka të drejtë të rezistojë dhe të luftojë kundër pushtimit në përputhje me të gjitha ligjet dhe normat.
Lidhur me përleshjet në Gaza, të cilat kanë hyrë në ditën e 33-të, Kanu theksoi se Brigadat Izzeddin Kassam shkaktuan humbje të mëdha ushtrisë izraelite në automjete ushtarake dhe tanke.
Ai tha se Izraeli do ta humbasë këtë luftë si të mëparshmet dhe se në fund nuk do ta arrijë qëllimin e tij, ashtu siç dështoi në fillim të konfliktit në mëngjesin e 7 tetorit.
