Kryetari i Aleancës për Ardhmërinë e Kosovës, Ramush Haradinaj, ka bërë thirrje publike që ish-pjesëtarët e Ushtrisë Çlirimtare të Kosovës dhe familjarët e tyre të mos udhëtojnë nëpër Serbi. Ai ka zgjeruar paralajmërimin edhe për pjesëtarët aktualë dhe të kaluar të institucioneve të rendit dhe sigurisë, duke përfshirë edhe të afërmit e tyre të ngushtë.
“Pjesëtarët e UÇK-së dhe familjarët e tyre nuk duhet të udhëtojnë nëpër Serbi. Gjithë pjesëtarët e institucioneve të rendit dhe të sigurisë, qoftë të liruar nga detyrat dhe përgjegjësitë, si dhe familjarët e tyre të ngushtë, s’duhet të udhëtojnë nëpër Serbi. Mos e bëni këtë!”, shkroi Haradinaj në Facebook.
Thirrja e Haradinajt vjen një ditë pasi Gjykata serbe i caktoi masën e paraburgimit prej një muaji Arbnor Spahiut, i cili ishte ndaluar në pikën kufitare ndërmjet Hungarisë dhe Serbisë. Avokati i tij, Arianit Koci, e ka cilësuar arrestimin si të padrejtë dhe të motivuar politikisht, duke kërkuar reagim të menjëhershëm institucional nga kryeministri Albin Kurti dhe presidentja Vjosa Osmani.
