Kryetari i Këshillit Shqiptaro-Amerikan, Haxhi Dauti ka realizuar një drekë pune në Uashington me Zëvendës Ndihmës Sekretarin Amerikan të Shtetit, Gabriel Escobar dhe ambasadorin William Walker, njeriun që i tregoi botës për masakrën e Reçakut, përcjell INA.
“Një drekë private dhe miqësore në Washington me zv.ndihmës sekretarin e DASH, Gabriel Escobar dhe Ambasadori William Walker . Ishte një takim produktiv dhe miqësor, ku u bisedua për shumë tema, por tema kryesore ishte Kosova!”, ka shkruar veprimtari strugan, Haxhi Dauti.
Në këtë takim është biseduar posaçërisht për zhvillimet në Kosovë, por edhe për zhvillimet në rajon, ku inicues i takimit ka qenë veprimtari Haxhi Dauti. Zyrtari i lartë amerikan, Escobar ka përsëritur qëndrimet se Kosova mbetet një vend aleat i SHBA-ve dhe prioritet për të siguruar shtetësinë e saj. Ambasadori Walker në takim ka dashur të dëgjoj qëndrimin e detajuar zyrtar të SHBA-ve për Asociacionin dhe për tema të tjera, pasi që ai gjatë periudhës në vijim do të udhëtoj në Kosovë. Në takim janë prekur edhe zhvillimet aktuale në Maqedoninë e Veriut, Mal të Zi, Luginë.(INA)
