Deputeti i zgjedhur i Vetëvendosjes, Hekuran Murati, tha se i kanë numrat për formimin e qeverisë.
Por, ai s’iu përgjigj pyetjeve të gazetarëve se si i kanë siguruar ato vota.
“Gjithsesi”, tha Murati kur u pyet nëse janë gati për seancën e 15 prillit, e cila është caktuar për konstituimin e Kuvendit të Kosovës.
I pyetur më pas nëse i kanë numrat, Murati u përgjigj: “Patjetër që po. 61 – sa më shumë aq më mirë”.
“Sipas Kushtetutës, me vota të deputeteve të kuvendit”, tha ai, duke refuzuar të tregojë nëse kanë arritur ndonjë marrëveshje koalicioni meqë pa një të tillë Vetëvendosje e vetme s’i ka numrat.
“Për të gjitha këto [koalicionet me parti është çështje e subjektit, pra sekretariatit të Vetëvendosjes. Patjetër që do t’i kemi votat”, tha ai.
Edhe disa deputetë të tjerë nga Vetëvendosje sot shprehën optimizëm se i kanë votat për formim të qeverisë pa treguar se si i kanë siguruar.
Deklaratat e tyre vijnë dy ditë pas deklaratës së nënkryetarit të Vetëvendosjes, Glauk Konjufca, i cili tha se pa koalicion s’do ta kenë të mundur formimin e qeverisë.
