Shoqata “Zëri i Kafshëve” nga Velesi ka bërë thirrje që të ndërpritet problemi i kahmotshëm i helmimit të qenve.
Kjo shoqatë ka kërkuar që Ministria e Brendshme dhe organet e tjera përgjegjëse të gjejnë autorët e këtyre krimeve, duke i nxjerrë para përgjegjësisë.
Pas helmimit të një qeni gjatë fundjavës që ndodhi në rrugën kryesore të qytetit, shoqata “Zëri i kafshëve” thekson se imazhi i tmerrshëm i qenve të helmuar nuk është rrezik vetëm për kafshët, por edhe për njerëzit, e veçanërisht për fëmijët më të vegjël.
Meri Stojkova nga “Zëri i kafshëve” theksoi se helmimi i qenve me helm është bërë i përditshëm. Ata thuajse çdo ditë informohen për një kafshë të helmuar dhe sipas të dhënave të tyre në vit helmohen mbi 150 qen. Ata theksojnë se numri real i qenve të helmuar është shumë më i madh. Ajo theksoi se helmimi i qenve nëpër rrugët e Velesit është shtuar sidomos në pesë vitet e fundit. (INA)
