Rey Manaj ishte njeriu i ndeshjes në triumfin historik të Shqipërisë ndaj Serbisë, duke shënuar golin vendimtar që vulosi një fitore të paharrueshme për kuqezinjtë. Sulmuesi lushnjar, i emocionuar pas përfundimit të takimit, ndau ndjesitë e tij për një nga momentet më të rëndësishme të karrierës.
“Sinqerisht, nuk e kisha menduar se do të shkonim në Serbi dhe do të fitonim. Edhe nëse nuk do ta shënoja unë golin, do të isha po aq i lumtur nëse do ta bënte dikush tjetër. Rëndësi ka që morëm tre pikët dhe bëmë histori. Të gjithë, si ata që nisën titullarë ashtu edhe ata që hynë nga stoli, kontribuuan njësoj”, tha Manaj.
Koha YouTube Channel
Sa i përket festës së tij karakteristike me shqiponjën, sulmuesi theksoi se ishte një reagim i natyrshëm dhe aspak provokues: “Shqiponjën e bëra sepse e ndjeva në atë moment. Nuk ishte e planifikuar dhe nuk ishte provokim ndaj askujt. Thjesht doja të festoja për Shqipërinë dhe për popullin tonë. Kishim shumë emocione dhe presion përpara ndeshjes, por gjithçka shkoi siç duhet.”
Me këtë gol të artë, Manaj fut emrin e tij në librin e historisë së futbollit shqiptar, si protagonisti që ndihmoi Shqipërinë të marrë një nga fitoret më të rëndësishme ndonjëherë në arenën ndërkombëtare.
