Ambasadori i Shteteve të Bashkuara të Amerikës në Kosovë, Jeff Hovenier, në një intervistë për TV Dukagjini, ka folur rreth zhvillimeve të fundit që karakterizuan ditët e fundit, përfshirë procesin e dialogut Kosovë-Serbi të ndërmjetësuar nga Bashkimi Evropian dhe problemin me Asociacionin e Komunave me shumicë serbe (AKSHS).
Ai shprehu sërish mendimin e SHBA-ve se progresi drejt themelimit të AKSHS-së mbetet kritik për ndërtimin e së ardhmes së Kosovës si një vend sovran, multietnik dhe i pavarur e i integruar plotësisht në strukturat euroatlantike dhe evropiane, teksa kujtoi se është obligim ndërkombëtar i Kosovës me Marrëveshjen e Brukselit (2013).
Hovenier theksoi se SHBA-të e shohin si mjet të rëndësishëm AKSHS-së për të siguruar mbrojtjen e të drejtave të serbëve, por të jetë në përputhje me Kushtetutën e Kosovës dhe me vendimin e Gjykatës Kushtetuese.
Ai foli edhe për frikën jo për atë që sot paraqet legalisht ky mekanizëm, por për faktin se çfarë ai mund të paraqesë nesër, gjatë implementimit praktik, duke siguruar se në asnjë mënyrë nuk do të jetë nivel i tretë i pushtetit.
“SHBA-të nuk po i kërkojnë Kosovës që të bëjë diçka që shkel Kushtetutën e saj. Shtetet e Bashkuara nuk mbështet dhe nuk do të mbështetë diçka që edhe veç një grimë mund t’i përngjajë Republikës Serbe”, tha Hovenier.
