Parlamenti i Hungarisë votoi sot një ligj që miraton hyrjen e Finlandës në NATO, pasi aplikimi i saj për anëtarësim u pranua nga të 30 anëtarët e aleancës.
Finlanda dhe Suedia aplikuan për t’u anëtarësuar në NATO vitin e kaluar në përgjigje të pushtimit rus të Ukrainës, por procesi u bllokua nga Turqia dhe Hungaria.
Edhe pse kërkesa finlandeze tashmë është pranuar, ajo suedeze është ende pezull në parlamentin hungarez. Presidenti turk Rexhep Tajip Erdogan tha javën e kaluar se parlamenti turk do të nisë procesin e ratifikimit të anëtarësimit të Finlandës, por se kërkesa e Suedisë do të mbetet.
Nuk dihet se kur parlamenti hungarez do të votojë për anëtarësimin e Suedisë
Sekretari i Përgjithshëm i NATO-s, Jens Stoltenberg i ka kërkuar me këmbëngulje Turqisë dhe Hungarisë që të ratifikojnë të dyja anëtarësimet. Nuk dihet ende se kur parlamenti hungarez do të votojë për anëtarësimin e Suedisë.
Partia Fidesz e kryeministrit Viktor Orbán ka njoftuar se do të mbështesë ratifikimin, por javën e kaluar ligjvënësi i Fidesz, Csaba Hende tha se Suedia do të duhet ende të bëjë më shumë për të adresuar shqetësimet e disa prej kolegëve të tij parlamentarë.
Procesi i ratifikimit të Hungarisë është bllokuar në parlament që nga korriku, dhe në shkurt Orbán akuzoi Finlandën dhe Suedinë për përhapjen e “gënjeshtrave të plota” për demokracinë dhe sundimin e ligjit në Hungari.
