Deputeti i Alternativës, Hysni Ismaili, tha se shkarkimi si i ministrave të Alternativës ashtu edhe i zv/ministrave është bërë pa asnjë justifikim të qëndrueshëm dhe të besueshëm.
Sipas tij, në fakt u bë shkarkimi i partisë që vetëm para një viti e shpëtoi këtë vend dhe i hapi rrugën drejt fillimit të negociatave me BE-në, ndërsa Kovaçevskin nga një zv/ministër periferik e bëri kryeministër të vendit.
“Sa për informacionin tuaj, ish zëvendësministri i Arsimit ka qenë kuadri ynë më i mirë në fushën e arsimit. Për shumë vite është pedagog universitar në Fakultetin Pedagogjik në Shkup dhe ai ishte kuadri që mund të ndihmonte më shumë së gjithkush në vendin tonë në temën e arsimit, natyrisht sikur të mos e kishte ministër një militant partiak. Por, fati i këtij shteti dhe i këtyre qytetarëve është i tillë – shkarkohet eksperti, shpërblehet militanti. Në një shtet ku arsimi është në rënie të lirë, ku testet PISA na flasin për degradim të rëndë, edhe kur ofron kuadro që mund të ndihmojnë, së pari t’i bllokojnë e pastaj i shkarkojnë. Këtu është e qartë se sa është ora”, tha deputeti i AAA-së, Hysni Ismaili.
