Institucionet shtetërore të Kosovës kanë marrë nën kontroll fabrikën e ujit në komunën me shumicë serbe në veri të vendit, në Zubin Potok
Ministrja në detyrë e Ekonomisë në Kosovë, Artane Rizvanolli ka thënë se është ndërprerë veprimtaria ilegale e strukturave paralele në fabrikën e ujit në Zubin Potok, me kërkesë të Njësisë për Monitorimin e Ndërmarrjeve Publike të Ministrisë së Ekonomisë.
“Kjo fabrikë e ujit është aset kritik për furnizim të sigurt me ujë për mijëra qytetarë të Republikës së Kosovës në komunat veriore. Andaj, marrja nën kontroll e këtij aseti është çështje e sigurisë, e shëndetit publik dhe e shtrirjes së kontrollit institucional”, shkroi Rizvanolli.
Ajo tha se tani e tutje kjo fabrikë do të menaxhohet nga “KRU Mitrovica”, e cila do të sigurohet që ky sistem jetik të funksionojë sipas standardeve ligjore dhe teknike të Republikës së Kosovës.
“Furnizimi me ujë nuk mund të jetë mjet presioni politik apo kontrolli nga jashtë. Është një e drejtë bazike e qytetarëve tanë, dhe përgjegjësi e institucioneve tona publike që ajo të realizohet në mënyrë të sigurt dhe të barabartë për të gjithë”, shtoi tutje Rizvanolli.
Ajo falënderoi Policinë e Kosovës për mbështetjen dhe “KRU Mitrovicën” për gatishmërinë për t’u shërbyer të gjithë qytetarëve të Republikës së Kosovës pa dallim.
Dy ditë më herët me kërkesë të Njësisë për Monitorimin e Ndërmarrjeve Publike të Ministrisë së Ekonomisë u mbyll po ashtu kompania paralele e ujësjellësit “Ibar” në Mitrovicën e Veriut.
Po kështu, në ditët e fundit janë mbyllur edhe disa zyra që kanë funksionuar ilegalisht në veri të Kosovës, si institucione paralele.
