Lionel Messi ka dhënë një sinjal të qartë për të ardhmen e tij, ndërsa Inter Miami ka shprehur qartë dëshirën për të vazhduar bashkëpunimin me yllin argjentinas. Kontrata aktuale e 38-vjeçarit me klubin amerikan skadon në dhjetor të këtij viti, por palët janë në të njëjtën linjë për rinovim.
Pas eliminimit nga Kampionati Botëror i Klubeve, ku Inter Miami u mposht bindshëm nga Paris Saint-Germain me rezultatin 4-0, fokusi është zhvendosur te e ardhmja e Messit. Pavarësisht humbjes, Messi dhe skuadra e tij lanë përshtypje pozitive në turne, duke mposhtur gjigantin evropian FC Porto – një arritje historike për një ekip të MLS – ku Messi shënoi një gol fantastik nga goditja e lirë.
Sipas gazetarit të njohur Fabrizio Romano, një burim nga klubi ka konfirmuar se: “Leo është nën kontratë deri në fund të vitit 2025. Realiteti është që të dy palët janë të interesuara të vazhdojnë marrëdhënien. Po ndërmerren hapat e duhur me mendësinë e duhur që kjo të realizohet.” Romano shtoi se edhe kampi i Messit është “në të njëjtën faqe” me klubin.
Messi mund të jetë ndikuar edhe nga vendimi i rivalit të tij historik, Cristiano Ronaldo, i cili së fundmi ka zgjatur kontratën me Al Nassr deri në moshën 42-vjeçare. Kjo mund të ketë qenë një shtysë për argjentinasin që të vazhdojë të luajë edhe për disa vite të tjera.
Që nga ardhja e tij në SHBA në vitin 2023, Messi ka sjellë mentalitetin fitues te Inter Miami, duke i udhëhequr drejt fitimit të Leagues Cup dhe Supporters’ Shield – suksese të mëdha për një klub të themeluar vetëm gjashtë vite më parë.
Messi ka shënuar 50 gola dhe ka dhënë 24 asistime në 63 ndeshje për Inter Miami. Përveç performancës së tij në fushë, ai ka ndihmuar edhe në afrimin e bashkëlojtarëve të dikurshëm të Barcelonës si Luis Suarez, Sergio Busquets dhe Jordi Alba. Aktualisht skuadra drejtohet nga një tjetër ish-barcelonist dhe bashkëkombas, Javier Mascherano.
Me 916 paraqitje në nivel klubesh dhe mbi 700 gola në karrierë, duket se Messi nuk ka ndërmend të ndalet ende – dhe tifozët mund të presin edhe më shumë magji nga legjenda argjentinase në vitet e ardhshme.
