Simone Inzaghi, në konferencën tradicionale për shtyp, ka bërë një përditësim të situatës së Interit para ndeshjes ndaj Bayern Munichut në çerekfinale, duke u shprehur se gjermanët së bashku me Real Madridin janë favoritët kryesor për trofeun.
Ndeshja e parë do të luhet në ‘Allianz Arena’ të martën me fillim nga ora 21:00. Ziklatrit u kualifikuan në mesin e tetë ekipeve më të mira pas rezultateve të shkëlqyera në fazën e grupeve dhe po shpresojnë t’i shkojnë deri në fund kësaj gare.
Mesfushori shqiptar Kristjan Asllani është i pezulluar teksa Joaquin Correa nuk mund të luajë në Champions League, por ka dyshime të mëdha edhe për Alessandro Bastonin, Federico Dimarcon dhe Hakan Calhanoglu.
“Për sa i përket Bastoni dhe Calhanoglu, ata u stërvitën me ekipin në mëngjes, kështu që duhet të vlerësohen, teksa Dimarco u stërvit i ndarë. Lautaro ishte paraparë të luante vetëm pjesën e parë në Parma, por luajti 70 minuta. Ai është mirë dhe besoj se do të luajë nesër”.
“Ne na është rikthyer Barella nga pezullimi, por kemi humbur Asllanin, ndërsa Correa nuk është në listën e UEFA-s. Janë edhe mungesat e zakonshme për shkak të dëmtimeve – Zielinski, Dumfries dhe Taremi,”- është shprehur trajneri Simone Inzagh.
“Megjithatë, ata (Bayern) janë një ekip me përvojë, ata kanë mungesa njësoj si Interi. Por ata bëjnë presion shumë, janë shumë intensive, dhe për shumë vite kanë shkuar larg në këtë garë”.
“Kështu që, së bashku me Real Madridin ata janë favoritët e mëdhenj për trofeun, por ne do të vijmë këtu për të luajtur një ndeshje të mirë”, ka thënë Inzaghi.
