Me rastin e Ditës së Pavarësisë së Shteteve të Bashkuara të Amerikës, zëvendëskryeministri i parë i Maqedonisë së Veriut, z. Izet Mexhiti, ka uruar popullin amerikan, duke theksuar rolin jetik të SHBA-së në mbrojtjen e vlerave demokratike dhe përkrahjen ndaj vendeve dhe popujve liridashës.
“Amerika ka qenë gjithmonë për ne një simbol i shpresës dhe lirisë, një qytet i ndritshëm mbi kodër që ka frymëzuar lëvizjet çlirimtare anembanë globit”, ka deklaruar Mexhiti.
Ai shtoi se Shtetet e Bashkuara mbeten një partnere e pazëvendësueshme për vendin tonë dhe një faktor kyç për paqen, stabilitetin dhe zhvillimin demokratik në rajon.
Në këtë ditë të veçantë, Mexhiti ka shprehur mirënjohje për mbështetjen e vazhdueshme të SHBA-së ndaj Maqedonisë së Veriut dhe shqiptarëve, duke e cilësuar marrëdhënien dypalëshe si një partneritet të fortë që i lidh popujt tanë.
“Gëzuar 4 Korrikun, Ditën e Pavarësisë, Amerikë!”, përmbyll urimin e tij zëvendëskryeministri. (INA)
