Donald Trump ka shpallur fitoren në zgjedhjet amerikane, teksa iu drejtua mbështetësve në Florida. Ai e konsideroi këtë fitore “të jashtëzakonshme”, teksa tha se do të punojë për ta ndihmuar vendin “të shërohet”.
“Kjo ka qenë, besoj, lëvizja më e madhe politike e të gjitha kohërave. Nuk ka pasur një gjë të këtillë në këtë vend dhe më tej dhe tani do të arrijë një tjetër nivel të rëndësisë, sepse do t’i ndihmojmë vendit tonë që të shërohet, do t’i ndihmojmë vendit tonë që të shërohet. Kemi një vend që ka nevojë për ndihmë, dhe shumë keq ka nevojë për ndihmë. Do të rregullojmë kufijtë, do të rregullojmë gjithçka për vendin tonë”, tha Trump.
Një fjalë përshëndetëse para mbështetësve mbajti edhe kandidati për zv.president, James David Vance (JD Vance), i cili premtoi se me presidentin e ri Trump në krye, SHBA do të ketë rikthimin më të madh ekonomik në histori.
“Z.president, e vlerësoj atë që më lejuat t’iu shoqërojë në këtë rrugëtim. Të falënderoj për besimin që kishe ndaj meje. Dhe mendoj se e fituam këtë, rikthimin më të madh politik në historinë SHBA-ve. Nën udhëheqjen e presidentit Trump, ne nuk do të ndalojmë luftën për ju, për ëndrrat tuaja, për ardhmërinë e fëmijëve tuaj. Dhe pas rikthimit të madh politik në historinë amerikane, do ta udhëheqim rikthimin e madh ekonomik në historinë amerikane, nën udhëheqjen e Donald Trump”, tha Vance, pas çka Trump u shtoi “Faleminderit shumë, doli të ketë qenë zgjidhje e mirë”.
