Shpenzimet minimale mujore për një familje katëranëtarëshe në Maqedoninë e Veriut u rritën për 790 denarë vetëm gjatë muajit qershor, tregojnë të dhënat e Lidhjes së Sindikatave të Maqedonisë (LSM).
Sipas llogaritjeve të LSM-së, vlera e shportës minimale sindikale për muajin qershor ka arritur në 64.698 denarë, ndërsa nëse përfshihet edhe qiraja për një apartament 60 metra katrorë, shpenzimet mujore shkojnë në 80.073 denarë.
Vetëm për ushqim dhe pije, një familje është dashur të ndajë 23.167 denarë, që është 733 denarë më shumë se në maj.
“Pas përfundimit të masave aktive të Qeverisë, shporta minimale është rritur për 2.007 denarë brenda dy muajve të fundit, ndërsa vetëm ushqimi dhe pijet janë shtrenjtuar me 1.678 denarë,” thekson LSM në reagimin e saj.
Në prag të sezonit veror, shumë punëtorë po përballen me dilema nëse do të kenë mundësi financiare për pushime, ndërkohë që shpenzimet e përditshme po rriten vazhdimisht. Sindikatat paralajmërojnë revoltë dhe kërkojnë masa të menjëhershme nga Qeveria për kontrollin e çmimeve dhe rritjen e pagave.
Të dhënat zyrtare të Entit Shtetëror të Statistikës konfirmojnë gjithashtu trendin e rritjes së çmimeve, me një inflacion mujor prej 1.5% në maj, krahasuar me prillin.
